لوين رايحين اليوم ؟ اليوم رايحين لكل مكان بسورية ..
اليوم بدي إحكي عن الأيام الجاية . عن البرد و الشتي و التلج . عن المجاري و الشوارع و الطرقات يلي رح تطوف . عن البيوت يلي رح تنهار و الناس يلي رح تتشرّد . عن المستشفيات يلي مارح تلحق تعالج المصابين . مارح طوّل أكتر من هيك . لأنو المحطات أو بعض التلفزيونات قالت إنو جايتنا شتوية مرعبة متل أفلام الرعب يلي منشوف فيها فيضانات و كوارث . شي أكّد و شي كذّب و شي لغى و نفى . …. طيب وين الحقيقة ؟ مين بيعرف يقلي . يخبرني . الحقيقة وين ؟
نحنا فعلاً جايتنا شتوية قوية ؟ في مسؤول بإحدى المحطات الصديقة قال جهزوا المايوهات . شتوية بلباس البحر . ياترى لو فكّروا المسؤولين . قصدي لو فكّروا من زمان ببناء سدود تحفظ كل هالمي و المطر بالشتوية و تخزّنها ماكنا استفدنا منها أكتر . ؟؟ منستفيد منها بمياه الشرب و بتجينا مي حلوة بدل مية البيار . نتحمم منها و نطبخ منها و نشرب منها و نتهنى و نوفّر حق المي و نوفر مصارينا لولادنا ..
اتطمنوا . البلد ماعاد بدها ايادي عاملة . ولا محتاجين ولا جهلة . البلد بدها شباب مثقف . دارس و متعلم . والمي يلي رح نحتفظ فيها ورا السدود مو بس رح تسقينا مي تازة . كمان رح تولّدلنا كهربا . كهربا تريحنا و توفر علينا دفع فواتير الاشتراك يلي ما بترحم . وكمان توفرها لولادنا
يعني ربنا لما بيبعتلنا الخير . نحنا المفروض نغرق و نموت فيه ؟ ولا نحافظ عليه و نستفيد منو و يعيشنا بهنا و سعادة ؟
صدقوني أنا مالي عم ثرثر .. أنا عم قول آلام الناس و أوجاعها . و إذا غيرنا عم يقولو بسرّو .. نحنا منقولوا بصوت عالي ليسمعونا الكل . بعرف انو غيرنا سبقونا و قالوا . بس زيادة الخير خير . لازم الكل يقول و نضل نقول . و نضل نذكّر الناس . و نحسب حساب إذا الشتوية عن جد إجت قاسية .. مشان نعرف حالنا لوين رايحين ..